***កតព្វកិច្ច ៤ យ៉ាង***
ហៃសាធុជនទាំងឡាយអើយ
បានកើតមកហើយរាល់រូបា
ស្វែងរកវិជ្ជាហើយសិក្សា
រកសុីធ្វើការតាមកំណត់។
ទ្រព្យធនរកបានទាំងប៉ុន្មាន
ចាយតាមលំអានបានកំណត់
ព្រះពុទ្ធបានចែងបួនប្រាកដ
មានតាមបែបបទដូចតទៅ។
ទីមួយត្រូវសងបំណុលចាស់
ពុកម៉ែដែលចាស់គាត់រស់នៅ
គោរពបូជាប្រតិបត្តិទៅ
គាត់ជាម៉ែឪគុណធ្ងន់ណាស់។
ទីពីរគឺបុលបំណុលថ្មី
ដល់កូនប្រុសស្រីល្អត្រចះ
ចិញ្ចឹមផ្គត់ផ្គង់គ្មានខាតខ្វះ
ត្រឹមត្រូវល្អល្អះតាមតម្រា។
ទីបីបោះចោលក្នុងជ្រោះជ្រៅ
ជីវិតរស់នៅខ្នួនត្រូវការ
បរិភោគរាល់ថ្ងៃនោះឯងណា
រៀងរាល់អាត្មាខានមិនបាន។
ទីបួនកប់ទុកកំណប់ព្រេង
បុណ្យទានរមែនធ្វើកុំខាន
តិចច្រើនទៅតាមទ្រព្យធនធាន
សាងសង់ជាស្ពានឈានទៅមុខ។
បួនយ៉ាងដូចបានពោលមកហើយ
គួរកុំកន្តើយកត់ត្រាទុក
បទអាថ៌តបសងគុណម៉ែពុក
ជាគំរូទុកកូនចៅក្រោយ៕
